Visitamos A Casa das Ciencias

Martes 17 de decembro de 2019


Para finalizar as actividades do primeiro trimestre, as nenas e os nenos do Club  visitaron coas súas mestras a Casa das Ciencias na Coruña.

Desfrutamos dunha sesión de astronomía no Planetario," Da Terra ao Universo", e despois participamos das actividades interactivas que ofrecen os diferentes espazos do museo.

Unha tarde moi didáctica e divertida!!!

As moléculas e os cambios de estado.

                                                                              Martes 3 de decembro 2019



Hoxe imos ver como se comportan as moléculas de auga nos cambios de estado ou na tensión superficial.

Práctica 1. A formación da néboa.

Materiais:

- Un vaso de precipitado alto.
- Un embude
- Auga quente
- Xeo

Procedemento:
Colocamos a auga quente no vaso ata a metade.
Poñemos xeo no embude e colocámolo tapando o vaso.
No espazo que queda entre a auga e o embude  empeza a formarse unha nube.

Explicación

Molécula de auga

A néboa prodúcese polo contacto do vapor que desprende a auga quente co aire arrefriado polo xeo, prodúcese unha condensación.

Podemos observar ao mesmo tempo a auga nos tres estados: líquido, sólido e gasoso.

E, como están as moléculas de auga en cada caso?

As moléculas están máis xuntas no caso do xeo, máis separadas no líquido e moito máis no vapor.

Práctica 2. A pementa que escapa

Materiais:

- Un prato
- Auga
- Pementa negra moída
- Xabón líquido

Procedemento:

Nun prato con auga, botamos a pementa que vai quedar flotando na superficie.

Ao engadir unha pinga de xabón líquido a pementa escapa cara aos bordes do prato.

 

Explicación:

Isto sucede porque as moléculas de auga da superficie están unidas con máis forza formando unha película que impide que a pementa vaia ao fondo.

Isto é o que se coñece como tensión superficial. 

Ao botar o xabón esta película rompe e encóllese cara aos bordes levando a pementa consigo.

Máis moléculas de outono

                                                                         Martes 17 de novembro de 2019

Seguindo co estudo das moléculas, imos ver hoxe outra das que tamén están presentes na cabaza, un alcol.

Pregunta: Que lle dá ese olor tan característico á polpa da cabaza?
O responsable é un alcol, unha substancia que se evapora con facilidade.
Imos tentar reproducir unha destas moléculas!

Materiais:
- Plastilina de cor laranxa, de cor verde e de cor azul
- Escarvadentes

Procedemento:

A molécula deste alcol ten 6 átomos de Carbono, 12 de Hidróxeno e un de Osíxeno.

Facemos grupos de 6 alumnos e cada un vai facer unha molécula.

Facemos os átomos de Carbono coa plastilina laranxa formando boliñas.

Despois unímolas cos escarvadentes seguindo un esquema da molécula que xa temos buscado.

Unha vez feita a estrutura, facemos os átomos de Hidróxeno, de tamaño menor que os anteriores, coa plastilina verde.

Colocamos os átomos de Hidróxeno cos escarvadentes arredor dos átomos de Carbono, tendo en conta que cada un ten que ter catro enlaces, igual que na sesión anterior.

Finalmente colocamos o átomo de Osíxeno de cor azul.